Jo poochey koi

jo poochey koi kaun nagariya
teyro rana rahe sakhi
jo poochhey kou kaun sarovar
paar karey tou jaana hai
jo poochhey kou kaun baag ko
maali teyro phool chuney
tu kahiyo sakhi dilli nagri
meyro rana rahe kabhi
tu kahiyo sakhgi jamnajyu ko
paar kare bhi jaana hai
aru aapno kesh saja
yo kahiyo sakhi unko tu
jo baag ko naath yudhisthir
uhan humaro maali hai.

Bhaado key jaatey

bhado key jaatey
draupadi apni kaali karai
aakash par yun ulat gai
ki neeley kabootaron key ek jorey ney
parosiyon key chhajon ki ot ley socha hai
- ho na ho
yeh saawan key baadal ka ulta lota hai.

Dilli

ye kaisa intizaar hai, ye kaisi bemani chah ki kasak hai,
ki vasl-e-sukun ke darmiyan bhi dard-e-hijra ki mehak hai.

aisa nahin ki tamanna koi dar-e-yaar khari bebas hai,
phir ye merey ghar laundi, kis rooh ki junoon, kis khoon ki hawas hai?

hai zamee bhar ummeed-e-sukhan, sailab-e-jashna da falak hai,
mujh sey poochhta hi nahin koi ki ye rasm-e-bazaar kab talak hai.

ilm-e-daulat au gham-e-rezgaari sey oobey hain, kya sabab hai?
jab ki dilli bhi door nahin apney to phir ye kaisi talab hai?

had-e-jism, had-e-zehen, had-e-rooh ke baad aaee jo ye sarhad hai,
pataa nahin kaun mulk hai, kaun si kaum hai, kaun sa mazhab hai.

Sanskar

hain suni door jangalon ki kahaniyan,
ki jahan aur bhi sooraj hain,
aur bhi nadiyan hain,
aur bhi boliyan hain, patton ki
khusarfusar key parey.

merey sapney par hain, parindey hain,
merey pair, jar hain phir bhi zindey hain.

jaron,
tumhi rakhti ho mujhey khara,
tumhi urney nahin deyti,
apney kandhon ko kisi aur key kandhon sey jurney nahin deyti.

Six by six

ye din bhi mantar jaisa
ek sau aath
ek sau aath
harkat ho gaya hai.

aao merey paas
chhatis karor haathon
aur
merey kaan saaf karo.

taaki
jab mein uthoon
to mujhey
kam sey kam
sab kuchh
saaf to dikhey.

ekdum
six by six.

Patra 7

jab mein tumsey milney aata tha,
din sey jarjar sudh ko apney
kandhon sey latkakar, gaata aata tha.

haath jhulata, dag lambey bharta,
kachhi raat key keekar van sey
dhoomil dilli batein chunta.

kautik bunta, saanson ki sindhuchala par
dhooein key kshanik chhaley tairata,
ufanta aap, aur aap hi
aayu key prabal jwaar ko samjhata.

chhutey gin-gin, uthaley jeybon mein chhankata
kuchh rupayon ki jugat lagata,
guna bhag kar, jama ghata kar,
kesar pushp mol ley aata tha jab mein,

kaisi adbhut gati thi hriday ki vidushi,
kaisi garima thi lalaat par
kaisa tej aankhon mein!

jab mein tumsey milney aata tha
tum sa priyasi madhumay swar kar
apney batiyata, apney
neh key nutan swang rachata aata tha.

pattey ashant ashadh key kanaphoosi kartey
kharpar kharpar, kharpar kharpar,
wah gaya sarphira sahodar jo
sumano par ghaat lagata tha.

mitron ka jamghat do-taka thitholi karta,
mujhko deh ka dalit daas batata tha
aur samay ko swarn batata sehchar mera
vichitra roop dhar key muskata tha.

kintu din-din shayan kaksha mein,
tum marm udar ka dikhlati jab,
nihshabd nisha par vaksh dhara kar
jeewan vilay ka sikhlati jab -

dikhati kitni reykhayein kal key haathon mein
kitney satya sanatan mithya mein
kitna rasik lavanya tumhari baaton mein.

jab mein tumsey milney aata tha,
tumsey milkar bhi kyun madhukar
pehchan nahin tumko pata tha.

tum bhavan baney kya ashraya deytey,
mein pair pasarey so jaata tha,
tum timir chhor par muskatey
mein bhor samajh ukta jaata tha.

sakal nagar sey alag thalag,
jaahil jarjar bhesh dhara mein,
ek naam ki ratan lagata,
ek shwaas sey bandha bhara mein

uljha rehta uljhi jihwa mein,
har satya tathya par chhatkata
gaanth lagey akshar suljhata aata tha jab mein -

kaisa surbhit yah nagar tha
aur sapnon key shatdal mein bhi
tunhara kavi ekal tha.

jab mein tumsey milney aata tha,
jeewan key har phan, har jhanjhat sey kheeja,
avirat saans ki atal aavritti par jhunjhlata tha.

kintu yadi kuchh aisa hota,
path ki ghar-ghar jaati karoyon mein,
ek thaur mil jaata mujhko,
uthatey-giratey, nirantar chaltey,
pal sey trin-trin banati sadiyon mein,
avkash agar mil paata mujhkko,

yadi tumhari maadak smritiyan ley,
swapna-satya key chaurahey par,
kuchh der aur mein toh lagata,
kuchh der aur mein moh jatata,
sambhav tha tum ko saath samajh
mein aur akeyla ho jaata
ya phir tumhari ghari dhoondhata
apni hi bela kho jaata,

aur kisi sambhavit tat par,
taj kar lahar laalayit bhaav
milata mujhko bhi mera antim thehraav.

Patra 6

EK KITAB VIDUSHI TUMAHREY NAAM

pehla prishtha tha geeton ka,
kuchh mainey gaye, kuchh tumney,
kuchh geet batoi ban kar key
khud apni thaur chaley gaye.

pehla prishtha tarun tarangon ka tha,
kya tha? kuchh yaad nahin ab!
kuchh pal they, kuchh pagalpan tha,
aur yauvan jaisa saath nahin ab.

pehla prishtha, pehley pehel tha aaya,
pehli chithi sa bawara,
pehli baaton sa barbola,
pehli barish sa shor machata aangan mein.

wo, jo pehla prishtha tha na? sabsey pehla!
jahan kahani na thi, shabd na they,
naam na tha koi, bas harsh tha.
vidushi wah pehla prishtha tumhara sparsh tha.

kuchh panney parkar ab thithkein?
shayad bahar gali mein mela ho,
shayad bahar din bheetar se lamba hota ho.

chalo kuchh pal wahin chalein,
jahan kitab ka har prishtha pehla prishtha hota ho.